Орхон аймгийн Засаг дарга өнөөдөр аймгийн хэвлэл мэдээллийн байгууллагуудын сэтгүүлчидтэй уулзалт хийж, өнгөрсөн нэг жилийн хугацаанд хийсэн ажлынхаа талаар мэдээлэл өглөө.
Уулзалтын үеэр тэрээр дэд бүтэц, эрчим хүч, бүтээн байгуулалт, хотын тохижилт, боловсрол, эрүүл мэндийн салбар зэрэг бодлогын гол чиглэлүүдийн хэрэгжилтийн талаар дэлгэрэнгүй танилцуулж, цаашдын зорилтоо хуваалцсан юм.Тухайлбал, эрчим хүчний найдвартай байдлыг хангах, шинэ хорооллын дэд бүтцийн өргөтгөл, зам, гудамжны гэрэлтүүлэг, авто замын засвар шинэчлэл, мөн нийгмийн үйлчилгээний чанарыг сайжруулах чиглэлээр бодит үр дүн гарсныг дурдав.
Сэтгүүлчид уулзалтын үеэр иргэдийн анхаарлын төвд байгаа орон сууцны хүртээмж, хот төлөвлөлт, газрын ашиглалт, хөрөнгө оруулалтын бодлого зэрэг асуудлаар асуулт асууж, Засаг дарга хариулт өгсөн юм.
Засаг даргын хэлснээр ирэх онд хувийн хэвшлийн оролцоог дэмжих, залуусын хөдөлмөр эрхлэлтийг нэмэгдүүлэх, хотоо илүү ухаалаг, ая тухтай орчин болгон хөгжүүлэх бодлого хэрэгжүүлэхээр төлөвлөжээ.
