Эрдэнэт хотын 50 жилийн ойн хүрээнд иргэн, аж ахуйн нэгж, байгууллагуудаас “Эрин зууны бахархал Эрдэнэт” төрийн бус байгууллагад төвлөрүүлсэн хандивын хөрөнгөөр ерөнхий боловсролын сургуулиудад “Шүд угаах булан” байгуулах төслийг хэрэгжүүлэх хамтын ажиллагааны гэрээг байгууллаа.
Төслийн хүрээнд Орхон аймагт үйл ажиллагаа явуулж буй төрийн өмчийн 17 сургуулийн 22 хичээлийн байр, хувийн хэвшлийн дөрвөн сургуулийн хичээлийн байрыг хамруулан нийт 21 сургуулийн 26 хичээлийн байранд сурагчид шүдээ угаах боломжтой зориулалтын “Шүд угаах булан” байгуулна. Сургууль бүрт дөрвөн угаалтуур бүхий шүд угаах хэсгийг тохижуулахаар төлөвлөжээ. Энэхүү ажлыг 137.6 сая төгрөгийн хандивын санхүүжилтээр хэрэгжүүлэх бөгөөд Эрдэнэт хотын 50 жилийн ойг тохиолдуулан боловсролын салбарт хийгдэж буй хүүхэд бүрт хүртээмжтэй, үр өгөөжтэй хөрөнгө оруулалтын нэг болохыг албаныхан онцолж байна.
Сургуулийн орчинд сурагчдын шүд угаах зөв дадлыг төлөвшүүлэх чиглэлээр тодорхой ажлууд өмнө нь хэрэгжиж байсан ч зориулалтын орчин, материаллаг баазын хүрэлцээ хангалтгүй байжээ. Харин уг төсөл хэрэгжсэнээр хүүхдийн амны хөндийн эрүүл мэндийг хамгаалах, шүдний өвчлөлөөс урьдчилан сэргийлэх, эрүүл зан үйлийг хэвшүүлэхэд бодит дэмжлэг үзүүлэхээс гадна урт хугацааны үр өгөөжтэй хөрөнгө оруулалт болно гэж сургуулийн удирдлагууд үзэж байна.
