USD 3448.54₮
EUR 3663.73₮
CNY 500.38₮
RUB 47.57₮
KRW 2.7₮
Эрдэнэт хот байгуулагдсаны 50 жилийн ойг угтан бэлтгэл хангах ажлын явц, хэрэгжүүлж буй арга хэмжээний талаар ажлын хэсгээс мэдээлэл хийлээ.
50 жилийн ойн бэлтгэл хангах ажлын хэсгийн дарга Б.Оюун-Эрдэнэ “Эрдэнэт хот цэвэр цэмцгэр, амгалан тайван орчин, залуусын хот хэмээх өнгө төрхөөрөө Монгол Улсад танигдсан. Энэхүү нэр хүндээ улам бататгахын тулд айл өрх, аж ахуйн нэгж, байгууллага бүр өөрийн гаднах 50 метр орчмын талбайг тохижуулж, өнгө үзэмжийг сайжруулах нь чухал. Иймд ‘50 жил – 50 метр’ санаачлагыг эхлүүлж байна” хэмээн онцоллоо.
Мөн аж ахуйн нэгж, байгууллагуудтай уулзалт зохион байгуулах ажлын хэсгийн дарга М.Мөнхбаяр тус ажлын явцын талаар мэдээлэл өглөө. Тэрээр “50 жилийн ойн тохижилтын ажлын хүрээнд 20 гаруй удаагийн уулзалтыг зохион байгуулж, 500 гаруй аж ахуйн нэгж, байгууллагыг хамруулсан. Уулзалтаар байгууллагуудыг өөрсдийн гаднах 50 метр орчмын зам талбайг засаж тохижуулах, хаягжилтыг нэгдсэн стандартад оруулах чиглэлээр хамтран ажиллахыг уриалсан” гэлээ.
Өнөөдрийн байдлаар 32 аж ахуйн нэгж, байгууллага гаднах орчноо тохижуулах төлөвлөгөөг ирүүлээд байна. Мөн байгууллагууд тохижилтын ажлаа эхлүүлээд байгаа талаар мэдээлэв.
Эрдэнэт хотын 50 жилийн ойг угтан хэрэгжүүлж буй энэхүү санаачлага нь хотын өнгө төрхийг сайжруулах, иргэдийн оролцоог нэмэгдүүлэх, ая тухтай орчин бүрдүүлэхэд чухал хувь нэмэр оруулах юм.
0 сэтгэгдэл