Баян-өндөр сумын хөрөнгө оруулалтаар барьж буй анхны цэцэрлэг 01 сарын 29-нд нээлтээ хийнэ. Сургууль, цэцэрлэгийн хөрөнгө оруулалтыг улсын болон орон нутгийн төсвөөс шийддэг байсан бол Орхон аймаг Монгол Улсад анх удаа сумынхаа хөрөнгө оруулалтаар 150 хүүхдийн багтаамжтай цэцэрлэгийг 2,8 тэрбум төгрөгөөр барьж ашиглалтад оруулж байна.
Тус цэцэрлэгийг Баян-Өндөр сумын “Чандмань” баг буюу шинээр үүссэн VII хороололд барьж байгаа юм. Орхон аймагт сүүлийн жилүүдэд орон сууцны шинэ хорооллууд нэмэгдэж сургууль, цэцэрлэг, нийгэм, соёлын үйлчилгээний барилга, байгууламж шаардлагатай болсон юм. Иймд тус хорооллын оршин суугчдад зориулж 150 хүүхдийн багтаамжтай цэцэрлэгийг барьжээ. Нийт 27 ажлын байр шинээр нэмэгдэж байгаа юм.
