Оюут багийн 2а хорооллын баруун талын 500 гаруй метр авто зам өнгөрсөн оны аравдугаар сард ашиглалтад орсон. Өнөөдрийн байдлаар тус авто замын А1001 буюу улсын чанартай авто замтай нийлдэг хэсэгт ихээхэн эвдрэл үүсээд байгаа юм.  Ашиглалтад ороод нэг жил хүрэхгүй хугацаанд эвдрэл үүсээд буй  авто замын асуудлаар аймгийн Засаг дарга М.Түмэнжаргал холбогдох албаныхны хамтаар ням гарагт газар дээр нь ажиллаж, зам засварын ажлыг энэ долоо хоногт эхлүүлэх үүрэг өглөө. 

Тэрээр, “Хүнд даацын авто машиныг явуулахгүй байх аймгийн Засаг даргын захирамж, ИТХ-ын тогтоол яагаад хэрэгжихгүй байна вэ.  Энэ замын ажлыг хийсэн гүйцэтгэгч “Өлзийхутагийн наран” компанийн баталгаат хугацаа дуусаагүй. ААНБ-уудтайгаа уулзаад замаа засах ажлыг энэ долоо хоногтоо эхлүүл.  Татвар төлөгчдийн мөнгөөр ажил хийж  байгаа бол ийм үр ашиггүй хөрөнгө оруулалт байж болохгүй.  Даацын хяналтаа сайжруул.  Зүүн талаар түр зам гаргах трассыг нь гаргаж өг ” гэлээ. 2а хорооллын асфальтбетонон хучилттай 500 гаруй метр авто замын ажлыг “Өлзийхутагийн наран” ХХК гүйцэтгэж,  өнгөрсөн оны аравдугаар сард ашиглалтад оруулсан.  Эвдрэл үүссэн үндсэн шалтгаан нь 2а хорооллын барилгажилттай холбоотойгоор хүнд даацын автомашин тээвэрлэлт хийснээс үүдэн гэмтэл гарсан гэх улсын байцаагчийн дүгнэлт гарсан байна.  Тодруулбал, газар хөлдөлтийн үе эхэлж байхад 60 тоннын хуурай цемент, арматур ачсан хүнд даацын авто машин өдөр, шөнөгүй тээвэр хийснээс үүдэн ийм нөхцөл байдал үүсчээ. 

Авто зам ашиглалтад орохтой зэрэгцэн тухайн үед 2а хороололд барилга барьж буй компаниудад  тус хэсгийн авто замаар  тээвэр хийж болохгүй. Эвдрэх эрсдэлтэй. Түр зам гаргах тухай саналыг удаа дараа хүргүүлсэн ч ААНБ-ууд хүлээж аваагүй байна. 

Харин өнөөдөр үүсээд буй авто замын  асуудлаар барилгын ажил эрхэлж буй долоон  компанитай  уулзахад авто замын эвдрэлийг засах төсөв мөнгийг нь гаргаж өгнө. Түр зам гаргаж өгөөч гэсэн хүсэлт тавьсныг шийдвэрлэхийг үүрэг болголоо. 

Мэдээ танд ямар санагдав?

0

0

0

0

0

0