Орхон аймгийн Баян-Өндөр сумын VI хорооллын уулзвараас Их залуу баг хүртэлх А1002 дугаартай улсын чанартай авто замыг дөрвөн эгнээ болгон өргөтгөн шинэчлэх ажлыг гүйцэтгэх тендерт “Шилдэг зам” ХХК шалгарч, 2024.05.08-наас 2024 оны 10 дугаар сарын 11-н хүртэл /149 хоногийн хугацаанд/ гүйцэтгэхээр гэрээ байгуулсан.
Гэрээний хугацаанд ажлаа гүйцэтгээгүй тухайн компани гэрээ сунгах хүсэлтээ захиалагч талд ирүүлж 2025 оны 7 дугаар сарын 1 хүртэл гэрээг сунгасан. Дээрх хугацаанд захиалагчийн зүгээс тухайн замын ажлыг урагшлуулах, ашиглалтад оруулах талаар онцгой анхаарч, дэмжин ажилласан болов ч “Шилдэг зам” ХХК-ийн гэрээнд заасан авто замын ажил удааширч, үр дүн гараагүй тул 2025 оны 8 дугаар сарын 19-нд 01/2456 дугаартай албан бичгээр 2025 оны 9 дүгээр сарын 1-ний өдрөөр БЗА-7224 дугаартай гэрээг цуцлах мэдэгдлийг хүргүүлсэн.
Тухайн компани нь орон нутгийн төсвийн 13.3 тэрбум төгрөгийн санхүүжилтээр VI хорооллын уулзвараас Их залуу баг хүртэлх А1002 дугаартай улсын чанартай авто замыг дөрвөн эгнээ болгон өргөтгөн шинэчлэх ажлыг гүйцэтгэхээс, хийсэн ажил нь 38.8 хувийн гүйцэтгэлтэй, 5,1 тэрбум төгрөгийн санхүүжилт авсан байна.
Гэрээг цуцалж байгаатай холбоотойгоор дутуу ажлыг гүйцэтгүүлэх тендер сонгон шалгаруулалтыг зохион байгуулна. Мөн “Шилдэг зам” ХХК-ийн гэрээний үүргээ биелүүлээгүйгээс учирсан хохирол, алдангийг нэхэмжилж шүүхэд хандана.
